ភ្នំពេញ៖ ក្នុងកិច្ចខិតខំប្រឹងប្រែងស្តារសណ្តាប់ធ្នាប់សាធារណៈ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានចេញបទបញ្ជាឲ្យអាជ្ញាធររាជធានី-ខេត្ត អនុវត្តវិធានការរដ្ឋបាលតឹងរ៉ឹងចំពោះក្រុមក្មេងទំនើង ដែលបង្កការរំខានដល់សុវត្ថិភាពសាធារណៈ ដោយការបង្ហោះម៉ូតូនៅតាមដងផ្លូវសាធារណៈ។ ត្រូវអនុវត្តភ្លាមៗ រាល់ម៉ូតូដែលរឹបអូសពីក្មេងទំនើងបង្ហោះម៉ូតូនឹងត្រូវរក្សាទុកក្នុងរយៈពេលពី ៣ទៅ៦ខែ។
ការប្រកាសនេះបានធ្វើឡើងនៅព្រឹកថ្ងៃទី២៩ ខែកក្កដា ឆ្នាំ២០២៤ បន្ទាប់ពីមានការព្រួយបារម្ភជាសាធារណៈពីបញ្ហាសណ្ដាប់ធ្នាប់ដែលបង្កឡើងដោយក្រុមចោរកាច់កុងម៉ូតូទាំងនេះ។ សម្តេចនាយករដ្ឋមន្ត្រីបានសង្កត់ធ្ងន់ថា សកម្មភាពទាំងនេះ គឺចាំបាច់ដើម្បីការពារអ្នកធ្វើដំណើរ និងរក្សាសណ្តាប់ធ្នាប់សាធារណៈ។
សម្តេចនាយករដ្ឋមន្ត្រី ហ៊ុន ម៉ាណែត បានកោតសរសើរដល់អាជ្ញាធរមូលដ្ឋាន ដែលបានធ្វើការបង្ក្រាបក្រុមដាវស៊ាំម៉ារ៉ៃ ដែលបង្កហានិភ័យដល់ខ្លួន និងសន្ដិសុខសណ្ដាប់ធ្នាប់ នៅក្នុងសង្គមបានល្អ ហើយបានបញ្ជាក់ថា ខណៈក្រុមមួយចំនួននៅតែបន្តសកម្មភាពរបស់ខ្លួន គឺមានការថយចុះគួរឲ្យកត់សម្គាល់។ សម្តេចមានប្រសាសន៍ថា ទោះបីថមថយក៏ដោយ ក៏មិនត្រូវធ្វេសប្រហែសឡើយ ត្រូវតែអនុវត្តឱ្យបានជាប់ជាប្រចាំ ដើម្បីថែរក្សាសន្ដិសុខជូនប្រជាពលរដ្ឋ ខណៈ សម្តេច បានមើលឃើញថា ក្រុមក្មេងទំនើងនៅតែមាន។
សម្តេចនាយករដ្ឋមន្ត្រីបានកត់សម្គាល់ថា “ទោះបីជាមានការថយចុះនៃសកម្មភាពក្រុមក្មេងទំនើងក៏ដោយ ការប្រណាំងម៉ូតូនៅតាមទីសាធារណៈនៅតែបន្តកើតមាន”។ សម្តេចអំពាវនាវឲ្យពង្រឹងការអនុវត្តវិធានការរដ្ឋបាល ដើម្បីទប់ស្កាត់បញ្ហានេះឲ្យកាន់តែមានប្រសិទ្ធភាព។ សម្រាប់បទល្មើសទី១ ម៉ូតូនឹងត្រូវរឹបអូសរយៈពេល៣ខែ ហើយសម្រាប់បទល្មើសដដែលៗ រយៈពេលរឹបអូសនឹងបន្តដល់៦ខែ។
សម្តេចនាយករដ្ឋមន្ត្រីក៏បានសង្កត់ធ្ងន់ផងដែរអំពីសារៈសំខាន់នៃការថែរក្សាឱ្យបានត្រឹមត្រូវចំពោះម៉ូតូដែលរឹបអូស និងធានាបាននូវសុវត្ថិភាពត្រឡប់ទៅម្ចាស់ និងក្រុមគ្រួសាររបស់ពួកគេវិញនៅពេលដែលរយៈពេលវិន័យត្រូវបានបញ្ចប់។ សម្តេចសង្ឃឹមថា វិធានការថ្មីទាំងនេះនឹងកាត់បន្ថយការប្រណាំងម៉ូតូបានយ៉ាងខ្លាំង ដោយសម្តេចបញ្ជាក់ថា៖ «បើអស់ម៉ូតូ គឺមិនអាចបង្ហោះបានទេ»។
បន្ថែមលើនេះ សម្តេចនាយករដ្ឋមន្ត្រីបានលើកឡើងពីផលប៉ះពាល់នៃការបង្រ្កាបនេះ ដោយបានគូសបញ្ជាក់ថា ការកាត់បន្ថយសកម្មភាពប្រណាំងម៉ូតូ រួមចំណែករក្សាសណ្តាប់ធ្នាប់សាធារណៈ និងកាត់បន្ថយហានិភ័យគ្រោះថ្នាក់។ សម្តេចបានលើកឡើងពីឧប្បត្តិហេតុកន្លងមកដែលការជិះម៉ូតូមិនប្រយ័ត្នបាននាំឲ្យមានគ្រោះថ្នាក់ដល់ជីវិត។
នៅក្នុងសារសំឡេង សម្តេចនាយករដ្ឋមន្ត្រី ហ៊ុន ម៉ាណែតក៏បានអំពាវនាវដល់មាតាបិតាទាំងឡាយឱ្យយោគយល់ និងសហការគ្នា នៅពេលដែលវិធានការទាំងនេះប៉ះពាល់ដល់កូនរបស់ពួកគាត់។ សម្តេចបានជំរុញឲ្យមាតាបិតាអប់រំកូនអំពីគ្រោះថ្នាក់ និងផលវិបាកនៃការចូលរួមប្រណាំងម៉ូតូ។ តាមរយៈវិធានការទាំងនេះ រដ្ឋាភិបាលកម្ពុជាមានគោលបំណងបង្កើតទីសាធារណៈដែលមានសុវត្ថិភាពជាងមុន និងការពារប្រជាពលរដ្ឋពីគ្រោះថ្នាក់ដែលបង្កឡើងដោយក្រុមក្មេងទំនើងម៉ូតូ៕
ព័ត៌មានជាច្រើនទៀតសម្រាប់អ្នក
